Kort om kampen:

Ei heller ujamn gjennomføring enda til slutt med siger, men den sat langt inne. Stranda hadde, kampen sett under eitt, gode sjansar til å avgjere dette til eigen fordel. Vi får ta med oss det positive, vi vinn på ein dag der det er mykje som ikkje fungerer.

Vi fekk ikkje satt i gong det høge presset vi ville. Stranda låg etter kvart djupt i bana, hadde spelet framfor seg og heldt oss på avstand. Vi kom til få avslutningar. Stranda spelte med liten risiko, var direkte i stilen og tok oss gong etter gong på at vi stod høgt i bana. Avklaringane var lange og presise, enda i bakrom på to gode beveglege spissar, med eit strynelag halsande etter.

Kva må vi jobbe vidare med?

Defensivt må vi jobbe med pressledda våre. Skal vi få dette til, må innsats og evne til å flytte bein bli betre. I tillegg må vi jobbe hardare i sonene våre. I forsvarsleddet sleit vi med avstandar spesielt sidelengs. Sikringsforholda var ikkje gode.

Offensivt må vi bli flinkare til å halde ball i laget. Vi spelte mykje fin fotball frå 16 meter til 16 meter, men svært mange av forsøka vart stoppa før vi kom til avslutning. Stranda framprovoserte svært mange brot på vår siste tredjedel av bana. Her må vi bli tydlegare i bevegelsane og dyktigare i valga vi gjer som ballførar.

Likevel scorar vi 4 mål. Stian scorar etter eit fint gjennomløp etter pasning frå Christian. Begge måla til Jan Marius kjem etter legg frå kant, der Laksen er på rett plass til rett tid, slik ein målscorar skal være. Krissi sitt mål kjem på dødball, etter god serve av Petur.

No skal vi gjennomføre ei god veke med trening før vi set nasen mot Molde. Her ventar to tøffe kampar mot Træff og Rival.